ROXAS CITY – Kinahanglan nga mahatagan sang nagaka-igo nga aksyon ang asud-asud nga nagakahinabo nga krimen sa syudad sang Roxas.
Ini ang kaundan sang diskurso pribilihiyo ni City Councilor Atty. Albert Gregory Potato, chairman sang Police, Fire and Peace and Order sa ginpatigayon nga regular session sang Sangguniang Panlungsod kasunod sang nagaduging nga kriminalidad sa Roxas City.
Partikular nga malapnagon sa karon ang asud asod nga pagkinawatay, pagpangluthang kag pagpanghold-up.
Nagluntad ang una shooting incident sa Barangay Banica sa diin napatay ang biktima, ginsundan ini sang insedente sa Arnaldo Blvd, Barangay Baybay sang nagligad nga Lunes kag ang pinakaulihi amo ang paghold-up sang nagaisahanon nga suspek sa lima ka mga estudyante sa separado nga lugar kagab-i.
Bilang aksyon sang opisyal, magapatawag sang committee hearing ang iya komitiba agud mahinalaan ang lihok nga pagahimuon para matapna ang kriminalidad nga nagatuga naman sang kakugmat sa mga residente sa syudad sang Roxas.
Mangin kabahin man sang sinapol ang mga katapu sang Roxas City PNP nga magapresentar sang ila pagahimoon nga tikang agud indi na makapamentaha ang manughingalit nga mga indibidwal.
Samtang nagpanawagan man si Potato indi lamang sa mga pulis kundi kalakip sa mga opisyales sa barangay nga pasangkaron pa ang ila paglibot ukon pagroving kag ipatuman ang curfew.
