Naglab-ot sa masobra 420,000 ang numero sang mga bag-o nga salakyan nga nabaligya sa Pilipinas umpisa Enero tubtob Nobyembre 2025, sandig sa datos sang Chamber of Automotive Manufacturers of the Philippines Inc. (CAMPI) kag Truck Manufacturers Association (TMA).
Sa kabilugan, naglab-ot sa 420,776 units ang nabaligya sang automotive industry, samtang 37,352 units naman ang narekord sang sa Nobyembre lang. Nagapanguna sa gihapon ang commercial vehicles sa baligyaanay, ginasundan sang passenger cars nga padayon nga ginabakal bangud sa fuel-efficient kag entry-level models.
Nagapadayon man ang pagsaka sang electrified vehicles, nga nakarekord sang 28,102 units ukon kabaylo sa 6.68% sang kabug-usan nga nabaligya, kun sa diin ang hybrid vehicles ang may pinakadako nga amot.
Suno sa Chamber of Automotive Manufacturers of the Philippines Inc. (CAMPI) kag Truck Manufacturers Association (TMA), nagapabilin nga positibo kag mapag-on ang industriya samtang ginalauman ang pagtaas sang demand sa pagtakop sang tuig.
