Personal nga nagdangop ang isa ka babaye sa istasyon sang Bombo Radyo Roxas agud nga ireklamo ang isa ka lalaki nga ginaalegar magamo sa Isla Bonita, barangay Tanque, Roxas City.
Ginkilala ang tagreklamo kay alyas “Nene”, yara sa legal nga pang edaron kag residente sang nasambit nga barangay.
Samtang ginkilala naman ang lalaki nga ginareklamo kay alyas “Ting”, yara sa legal nga pang-edaron kag temporaryo nga nagapanguyo sa nasambit nga lugar.
Suno kay alyas “Nene”, ginpahayag nga nagatuga sang gamu ang amu nga lalaki sa ila nga lugar ilabi nagid sa oras sang pagpahuway.
Dugang pa sini, sa kada ti-on nga nagatuga ini sang gamu, yara ini sa impluwensya sang makahulubog nga ilimnon kag may bes pa nga nagapinanglampos ini sa karsada sang mga botelya.
Mahibaluan, nga nagaisahon lang ini sa amu nga puluy-an kag ginaalegar may mga menor de edad ini nga ginapakadtu sa iya nga puluy-an kag ginaalegar ginapainom sang makahulubog nga ilimnon.
Samtang, dugang pa ni alyas “Nene”, ginpalab-ot nya na ini sa ila nga barangay kag suno pa sa iya, indi lamang sya ang nagpalab-ot sang reklamo apang may iban pa nga mga residente.
Luyag nila suno sa iya nga pahalinon sa ila nga barangay si alyas “Ting”, bangod ginpahayag nga indi ini maayo nga impluwensya sa mga pumuluyo ilabi na sa mga kabataan kag ginapahayag pa nga magamo sa ila nga lugar nga isturbo naman sa tion sang ila nga pagpahuway.
Sa karon, ginapangabay ni alyas “Nene” kag sang pila pa ka mga residente nga mahatagan sang aksyon ang ila sini ginpalab-ot nga reklamo sa ila nga barangay.
