ROXAS CITY-Ginkompirmar sang Dumalag Municipal Police Station nga magkakilalahay ang ginpatay nga babayi sa Barangay San Juan Dumarao, Capiz nga si Rose Bering sang Anilao,Iloilo kag ang lalaki nga ginpatay sa Barangay Dolores, Dumalag Capiz.
Suno sa Dumalag Municipal Police Station nga tubtob subong wala pa sang kumpirmado nga pangalan ang lalaki nga biktima apang sa ila nga pagpangusisa nga may nakahatag sang impormasyon sa ila nga ang pangalan sang biktima sa Facebook amo si certain “JROA LOPEZ”.
Gilayon nga gin-verify sang mga kapulisan ang amo nga impormasyon kun sa diin nakompirmar nga ang lalaki nga ginpatay sa Dumalag kag ang lalaki nga may pangalan nga JROA LOPEZ ang isa lang ka tawo.
Una nga ginbasihan amo ang iya sini nga tattoo sa natuo nga kamot kag suksuk sini nga medyas kag sapatos nga lunsay nagasanto man sa mga nakita sa Facebook post ni LOPEZ.
Apang indi pa matul-di kun ano ang kompirmado nga pangalan sang biktima bangud tubtob subong wala pa sang pamilya nga naga-claim sa bangkay sini sa isa ka punenarya sa nasambit nga banwa.
Samtang sa pinakaulihe nga post sa Facebook ni certain JROA LOPEZ sadtong Oktubre 7 sini nga tuig nga magkaupod sila ni Bering.
Sa karon nagapakig-angut na ang Dumalag Municipal Police Station sa mga kapulisan sa probinsiya sang Iloilo sa dugang nga mga imbestigasyon.//
