IVISAN, CAPIZ – Padayon sa karon nga ginabulong sa isa ka pribado nga ospital sa Roxas City ang babayi nga pasahero sang Ceres bus matapos gintiro sang wala pa makilan-an nga mga suspek.
Ginkilala ang biktima nga si Sharon Pamusay, 45-anyos nga residente sang banwa sang President Roxas.
Sa inisyal nga imbestigasyon sang Ivisan PNP, nagsakay sa Iloilo ang nasambit nga biktima kag padulong ini sa Roxas City. Ginapahayag nga samtang nagapondo ang bus sa Mianay, Ivisan, may nanaog nga pasahero sa diin may isa man ka pasahero nga lalaki nga nagsunod panaog nga amo ang nagtiro sa biktima samtang nagapungko sa sulod sang bus.
Suno pa diri nga sa banwa palang sang Dao nagsakay na ang amo nga suspek kag may kaupod ini nga nagasunod nga motorsiklo nga amo ang getaway vehicle sang suspek kag nagpadulong sa direksyon sa banwa sang Sigma.
Nag-angkon sang pilas sa tiyan ang biktima tuga sang pagpangtiro samtang wala pa matumod ang armas-luthang nga gingamit sang suspetsado.
Sa karon, padayon pa nga ginapadalman sang katapo sang kapulisan ang imbestigasyon agud matumod ang suspek kag kun ano ang motibo sa nasambit nga insidente.
