ROXAS CITY – Wala na makapalagyo pa sa ginkasa nga entrapment operation sang National Bureau of Investigation (NBI)- Capiz sa Pueblo de Panay, ang suspek nga ginkilala kay alyas Didith.
Nahibaluan nga nagreklamo ang biktima nga ginkilala kay alyas Shey, kag ginapahog ini sang suspek nga ipalapta sini ang iya nga video kun sa diin makit-an nga ginatandog sini ang pribado nga parte sang iya lawas nga naga isahanon ukon “nagasarili”.
Sa impormasyon nga nakuha sang Bombo Radyo Roxas kay Agent John Katipunan, Executive Officer sang NBI-Capiz District Office, nga sang tinalikdan nga semana nakig-angut ang biktima sa ila talatapan, kag ginsaysay ang pagpamahog sang suspek.
Ginpakamaayo naman sang NBI nga papulion diri ang biktima nga sang nasambit nga tion yara sa Maynila agud maistoryahan sang maayo ang masunod nga tikang.
Mahibaluan, nga si alyas “Didith” kag “Shey ang mag-abyan kag nagsugod ang wala nila pag-intindihanay matapos nag-utang ang biktima sa suspek sang masobra P400,000 nga dapat mabayaran sadtonh Agusto 5,2024.
Bangud wala makabayad ang biktima sa gintalana nga petsa, diri na ginpahog sang suspek nga ipalapta ang iya sex video nga una na nga naglapta sadtong 2022.
Sa karun yara sa kustodiya sang NBI Capiz ang suspetsado kag magapangatubang sa kaso nga “Grave Threats” kag “Extortion” in relation to R.A 10175 ukon “Cybercrime Prevention Act of 2012.
