ROXAS CITY – Napuhag ang mga pasahero kag personnel sang Roxas City Airport sa Barangay Baybay, Roxas City matapos makit-an ang isa ka makaduluda nga bag nga wala sang bantay (unattended baggage) sa arrival area sang paluparan.
Sa eksklusibo nga interview sang Bombo Radyo Roxas kay Police Lieutenant Jose Dexter Paulin, Officer-in-Charge sang Roxas Airport Police Station, iya ginpahayag nga gilayon sila nga nagresponde matapos ma-report sang airport personnel ang makaduluda nga bag nga nabilin sa isa ka porsyon sang terminal matapos masal-an nga may unod nga bomba.
Suno kay Paulin, ila insigida nga ginpatuman ang security protocol kag temporaryo nga pagkansela sang pila ka aktibidad samtang gina-inspeksyon ang bag.
Matapos ang maid-id nga pag-imbestigar sang explosive ordinance disposal (EOD) team, natukiban nga wala sang unod nga makatalagam ang bag kundi mga lago nga bayo.
Nagdugay sang masobra isa ka oras ang insidente antes gindeklara nga luwas ang lugar.
Nagpahanumdom naman si Lt. Paulin sa publiko, ilabi na sa mga biyahero, nga indi pagpabay-an ang ila nga mga gamit sa pampubliko nga lugar, ilabi na sa mga matawo nga lugar pareho sang airport.
Padayon man ang hugot nga pagbantay kag pagpatuman sang mga seguridad sa Roxas Airport agud masiguro ang kaluwasan sang mga pasahero kag personnel.
