ROXAS CITY, CAPIZ – Dako ang pagpasalamat sang bag-o nga Presidente sang Capiz State University (CAPSU) sa pagpili sa iya bilang ika-apat nga presidente sang unibersidad.
Sa interview sang Bombo Radyo kay Dr. Efren Linan, sa una nabudlayan man ini magdesisyon kun maga-apply ini sa bakante nga posisyon bangud dako nga responsibilidad nga magpungko bilang presidente sa prestihiyoso nga eskwelahan.
Suno kay Linan nga 30 na ini ka tuig sa CAPSU kag nakita sini ang mga kinahanglan kag dapat pasangkaron nga programa para sa ikaayo sang unibersidad.
Dugang pa sini nga na nag-agi sila sa maid-id nga proseso matapos naghimo ang Board of Regents sang Search Committee para sa masunöd nga presidente.
Kasubong nga nag-agi sila sa buho sang dagom sa pagkumpleto sa mga ginapangayo sang board kag pag-atubang sa pila ka serye sang interview.
Pagatutukan ni Linan ang research innovation, paayuhon pagid ang pagtudlo sa mga estudyante, proyekto nga makabulig sa unibersidad kag makapatigayon sang livelihood program sa mga pumuluyo matapos mapaidalom sa training luyag sini nga mabatyagan sa Capiz ang mga programa sang CAPSU.
Nakita man sini nga importante ang laboratory equipments para indi na magbayad ang mga estudyante.
Kumpletuhon man sini ang Certificate of Compliance sa CHED para sa mga kurso nga ginahatag sang unibersidad, pasanyugon man ang partisipasyon sang alumni para sa mga proyekto nga ila ginapresentar.
Kabahin lamang ini sang iya ginplastar nga mission, vision kag roadmap nga luyag nya matuman sa sulod sang apat ka tuig.
Si Dr. Efren Laguda Linan ang tumandok sa banwa sang Mambusao kag magapungko bilang ikaapat nga presidente sang unibersidad.
Matapos naman ang termino ni outgoing President Dr. Editha Alfon sa Setyembre 8 2023.
