ROXAS CITY – Nagtakup na ang imbestigasyon sang Fact Finding Committee sang Provincial Government angut sa ginaalegar kapabayaan sang Bailan District Hospital sang tion nga gindala ang mag-iloy nga Mary Cris Baylen kag ang ginabusong nga lapsag sini nga nagresulta sang ila kamatayon.
Ini ang ginkumpirmar ni Provincial Administrator Edwin Chinel Monares sang mainterview sang Bombo Radyo Roxas.
Sandig sa ginpatigayon nga imbestigasyon, nagaguha nga may pila ka mga rason nga ginakonsiderar ang komitiba kun ngaa natabo ang amo nga insidente.
Ang una amo ang pagka-delay sang nasambit nga iloy nga magdesisyon kun diin mangita sang bulig medikal.
Ginpahayag sini nga naintindihan niya ang kapigaduhon nga ginaagyan sang amo nga iloy kabangdanan nga indi nangin regular ang pagpadulong sini sa mga health centers agud magpapre-natal kag ang posible petsa sang pag-anak sini.
Gindugang pa ni Monares, bangud sa kakulangan sang atensyon sang mga doktor kag nurses sang tion nga ginpadulong na ang mag-iloy sa Bailan District Hospital ang ginatudlo nga isa man sa rason sang pagka-delay.
Wala man suno diri sang “Gross Negligence” ukon sala ang talatapan sang Bailan District Hospital angut sa kamatayon sang mag-iloy bangud sa nasambit nga rason.
Ginakabig nga tapos na ang imbestigasyon sang Fact Finding Committee nga naglawig sang duha (2) tubtob tatlo (3) ka bulan agud tutukan ang ginapahayag kapabayaan sang nasambit nga ospital.
