ROXAS CITY – Ginkumpirmar sang manugbaligya kag tag-iya sang flower shop sa syudad sang Roxas nga mahina pa ang ila benta sang mga bulak kag iban nga regalo sa Valentine’s day sa Pebrero 14.
Sa interview sang Bombo Radyo kay ‘Monek’ sang ‘Bebing Flowershop’ ginpahayag sini nga gamay pa sa karon ang nagabakal sang mga pangregalo kaangay sang mga tsokolate, teddy bear kag bulak, apang may mga nagpa-reserve naman.
Samtang, kapin 25 porsyento ang nangin pagtaas sa presyo sang bulak bangud nagpasaka man ang ila supplier.
Nahibaluan nga P300 ang pinakanubo nga presyo sang bouquet nga may yara sang tatlo ka bilog nga rosas, P600 naman ang may anum ka bilog nga rosas, kag nagadangat sa P1,000 tubtob P2,200 depende sa bulak kag design.
Isa ka libo ka pesos naman ang gintaas sang ila human size nga teddy bears, nagikan sa P1,500 nangin P2,500 na ini.
Nagabaton man ang mga ini sang made-to-order nga regalo nga ginalakipan sang teddy bear, bulak kag chocolates, kag nakadepende sa kadamuon sang item.
Nagalaum man ang mga ini nga madugangan ang mga customers nga magabakal sang pangregalo sa adlaw sang mga taguipusuon.
