Ginsulod sang wala pa matumod nga kawatan ang isa ka balaligyaan sa Barangay Bula banwa sang Mambusao.
Sa interview sang Bombo Radyo kay Marissa Loyola, tag iya sang balaligyaan, ginpahayag sini nga ang iya bayaw ang nagabantay sa amo nga balaligyaan. Bangud kampante ini nga sa amo nga tion wala sang may nagabakal, nagkadto ini sa banyo kag pagkatapos nagsabod ini sang manok.
Makita sa kuha sang CCTV, nag-parking ini sa higad sang dalan kag nagdiretso sa bulutangan sang kwarta apang sang natukiban nga wala sang may nagabantay, dumiretso ini sa kwarto kag didto nataban ang pouch nga may unod nga kwarta lakip ang mga benta sang amo nga balaligyaan, ginhapit pa sini ang cellphone antes ini maglakat.
Dugang pa sini nga sang natukiban sang bayaw sini nga nadula na ang iya cellphone, gilayon sini nga ginsarado ang amo nga balaligyaan kag nagpadulong sa police station.
Sandig man sa pagpangusisa sang biktima, ginpahayag sini nga pangayaw ang suspek sa ila lugar.
Panawagan ni Loyola, kun sin-o man ang nakakilala ukon nakakita sa amo nga persona, palihog nga i-report sa mga malapit nga police station. Magahatag man ini sang padya sa makakita kag maka-report sa amo nga makawat.
