ROXAS CITY –Nagapadayon sa karun ang imbestigasyon sang Roxas City Police Station sa ginkawatan nga balay sa Sitio Santo Niño, Barangay Baybay, Roxas City.
Suno sa biktima nga si Ariel Teorica, sang nasambit nga lugar nga samtang nagapanyapon sila nga magpamilya sa ila nga sala, hinali na lamang nga napatay ang bluetooth music sa sulod sang ila nga hulot kun sa diin nagakonekta ang iya nga cellphone.
Sang ginsekyar sang iya manghod, natukiban nga bukas na ang puwertahan sang hulot kag nadiskubrehan nga wala na ang pila ka mga kagamitan sini.
Kalakip sa mga nataban amo ang isa ka cellphone nga nagabalor P14,000, duha ka mga singsing nga nagabalor P18,000 kag P14,000, isa ka pouch nga may unod nga mga flash drives kag P400 nga cash.
Ginapatihan nga lunsay mga menor de edad ang nagsulod sa ila nga hulot.
Indi pa matumod ni Teorica kun sin-o ang nagsulod nga kawatan sa ila hulot apang ginpahayag sini nga may pila ka mga menor de edad nga naga-istambay sa ila nga kalan-an sang tinalikdan nga adlaw.
Samtang ginpanginwala naman sang duha ka mga menor de edad nga sila ang nagsulod kag nagpangawat sa balay sang biktima.
Suno sa pahayag ni Alyas Bobo residente sang Pavia St. Barangay IX sining siyudad nga nakibot na lamang ini sang ginpalapitan sang mga kapulisan samtang nagahampang sang computer.
Ginpahayag sini nga wala ini sang ihibalo sa nasambit nga kinawatay.
Ginsugid naman ni Alyas Nonoy nga may nakit-an ini nga isa man ka menor de edad nga nagsulod sa balay sang biktima.
Gintudlo sini ang isa ka menor de edad nga nakasuksuk sang nagaduag pula nga bayo kag may tina ang buhok apang hugot sini nga ginpanginwala nga kilala niya ang nasambit nga kawatan.
