ROXAS CITY – Partially burned ang isa ka balay matapos ang nagluntad nga sunog takna 1:50 kahapon, Enero 5, 2024 sa Sapian Ville Phase 2, Barangay Bilao, Sapian, Capiz.
Ang nasambit nga balay ang ginapanag-iyahan sang 58-anyos nga si Elizabeth Dotero.
Sa impormasyon nga nakuha sang Bombo Radyo kay FO2 Tomas Tomagan, arson investigator sang Sapian Fire Station, gilayon nga nagresponde ang BFP-Sapian matapos makabaton sang fire call sa amu nga lugar.
Nagaguwa sa inisyal nga imbestigasyon, nagikan ang kalayo sa kwarto kag madasig nga naglapta sa sulod sang balay nga human sa mixed light materials sa diin ginabulubanta nagdangat sa P180,000 ang nangin halit sang nasambit nga sunog.
Mahibaluan, wala sang tawo ang balay sang natabo ang sunog kag wala man sang suplay sang kuryente.
Sa karon nagapadayon pa ang imbestigasyon natuhoy sa nasambit nga insidente.
