ROXAS CITY – Totally burned ang isa ka puloy-an, matapos nga ginlamon sang kalayo sa Barangay Quinayuya, banwa sang Dao.
Ginkilala ang tag-iya sang balay kay Danilo Baticbatic, sa legal nga pang-edaron kag residente sang nasambit nga barangay.
Sandig sa imbestigasyon sang mga katapo sang BFP-Dao, nagluto kagab-i sang inughanda para sa iya kaadlawan ang mismo tagbalay kaupod ang ugangan sini nga si Jimboy Borres, sa ila dapog.
Apang, nakabugtaw nalang mga ini mga alas-12:10 sa kaaganhon nga nagakasunog na ang ila kusina, nga gilayon man nila gintinguhaan nga mapalong ang kalayo.
Nagaguwa sa inisyal nga imbestigasyon sang mga bumbero nga napabayaan nga niluto sa ila dapog, ang posible gintunaan sang kalayo.
Nadalahig man sa sunog ang duha ka mga motorsiklo nga Nmax kag Skydrive nga naka-park malapit sa ila kusina.
Gilayon nagresponde ang mga bumbero apang madasig ang paglapta sang kalayo.
Nahibaluan nga human sa mixed light materials ang nasambit nga balay kag ginabulubanta P600k ang kahalitan sang sunog.
Sa karon, nagapadayon ang imbestigasyon sang mga otoridad sa insidente.
