ROXAS CITY – Desidido nga magpasaka sang nagakaigo nga kaso ang 48 anyos nga tiya batuk sa iya kaugalingon nga gumangkon nga nagpaulan sang bala sa iya balay sa Barangay Parian, Sigma, Capiz.
Sa interview sang Bombo Radyo Roxas, ginpahayag ni Lowelyn Valdez nga tuman nga kahadlok ang natuga sang pagpaulan sang bala sang iya gumangkon nga si Cute Valdez, 30 anyos, residente sang nasambit man nga lugar.
Suno sa ginang, nagsugod ang gumangkon sini sa ila balay kaupod si Evangeline Gonzales kag nagpanghangkat sang away.
Bangud indi gusto sang gamo, ginapakamaayo ni Lowelin nga indi pagpatulan ang iya nga gumangkon.
Apang nakit-an sini nga nagbalik ang gumangkon sa iya salakyan agud magkuha sang armas.
Diri kag ginpaulanan na sang bala sang gumangkon ang balay sang iya tiya.
Indi magnubo sa 15 ka mga basiyo sang bala sang wala pa matumod nga armas ang narekober sang mga otoridad sa lugar.
Gilayon naman nga naaresto ang suspek sang mga katapo sang Sigma Municipal Police Station.
Mahibaluan nga madugay na nga may away ang pamilya ni Lowelin kag sang suspek antes pa man natabo ang insidente.
