ROXAS CITY – Nasapwan na ang isa ka grade 6 pupil nga halos tatlo ka adlaw na nga ginapangita matapos nga ini ang nalumos sa dam malapit sa Capiz Sugar Central sa banwa sang President Roxas, Capiz.
Nakit-an ang bangkay sang biktima nga si alyas Esing, nagabutho sa President Roxas Elementary School sa kasubaan nga sakop sang Barangay Pondol, sa nasambit man nga banwa.
Matandaan nga kaupod sang biktima ang iya mga abyan sang nakaligad nga adlaw sang Dominggo para kuntani magpangdamang apang naghagaday ang mga ini nga magpaligo sa dam.
Gin-anod sang mabaskog nga current sang tubig ang biktima rason nga wala na ini makabutwa.
Suno sa nakakita sa bangkay sang biktima, nagpadulong sila sa suba agud magpanuway apang ila ginkakibot sang makit-an ang bangkay sang biktima nga wala na sang panapton.
Ginahulat naman sang tiyo sang biktima ang mangin desisyon kun pahanugutan sila nga ihaya ang bangkay sang ila himata ukon diretso na ini nga ilubong.
