Ginkumpirmar sang hepe sang Mambusao MPS nga nadisgrasya ang nasapwan nga bangkay sang lalaki sa Barangay Bula, Mambusao Capiz.
Ginkilala ang napatay kay Frederick Quiachon, 29-anyos, negosyante kag residente sang Barangay Bilao, sa banwa sang Sapian.
Sa interview sang Bombo Radyo kay PCAPT. Dennis Losbañes- OIC sang Mambusao MPS, ginpahayag nga base sa imbestigasyon sang mga kapulisan nabunggo sa kahoy ang iya ginamaneho nga motorsiklo kag nalampos ining biktima kag buka ang iya ginasuksok nga helmet, rason nga nag-angkon sang patal nga pilas sa ulo ang biktima nga amo naman ang gintunaan sang iya nga kamatayon.
Dugang pa sini nga ginpahayag nga yara sa impluwensya sang makahulubog nga ilimnon ang nasambit nga biktima.
Mahibaluan nga nagbyahe ang biktima halin sa ila nga lugar padulong sa banwa sang Sigma agud nga kadtuan ang iya nga asawa.
Apang wala man ini nagdugay sa nasambit nga lugar kag nagbalik man sa banwa sang Sapian.
Ginkakibot naman sang pamilya nga wala ini nakapauli bangud ang nahibaluan nila papauli na sa banwa sang Sapian ang biktima.
Tuman ang ila nga kabalaka rason nga nagpost ini sila sa social media kag nagreport na sa mga kapulisan.
Suno sa imbestigasyon Marso 1 pa ini nga nadula kag nasapwan na lamang ini kahapon nga adlaw Marso 3, 2025 takna alas 11:00 sang aga.
Pahayag sang mga kapulisan nakita ini sang isa ka mangunguma sang ini ang nag-agi sa lugar kag nanotisyaran ini bangud sa malain nga baho kag daw kaangay amat-amat na ini nga nagaka-agnas ang iya nga lawas.
Sa karon, yara na ang bangkay sang amo nga lalaki sa isa ka punerarya sa ila nga lugar.
