Bangkay sang manug-ice cream, nasapwan na sa kasubaan nga sakop sang barangay poblacion proper, banwa sang Mambusao

ROXAS CITY – Nasapwan na ang bangkay sang 73-anyos nga manug-ice cream takna 11:00 sang aga sa kasubaan nga sakop sang Navarro Street, Barangay Poblacion Proper banwa sang Mambusao.

Matandaan nga gin-report nga missing si Leodegario Soriano Leonardo sang iya asawa matapos nga wala ini makabalik sang nagbakal sang bloke sang ice para sa ginabaligya nga ice cream sakay sa traysikad.

Apang, sang ini ang ginpangita sang otoridad, narekober ang gingamit nga traysikad sini kag sako indi magnubo 10 metros ang kalayuon sa puluy-an sang biktima.

Mahibaluan nga, nasapwan ang bangkay sang senior citizen tatlo ka adlaw matapos matabo ang insidente.

Sa karon, yara na sa isa ka punerya ang bangkay sang biktima.