2 menor-de-edad nalumos; 1 na-revived, 1 missing
ROXAS CITY – Padayon sa karon nga ginapangita ang isa ka menor-de-edad matapos nalumos samtang nagapaligo sa Baybay Beach sa Barangay Baybay, Roxas City.
Una diri, magkadungan nga nagpaligo sa baybay ang napulo ka tuig nga bata nga nasalbar sa pagkalumos kag ang nagapabilin sa karon nga missing nga 11-anyos nga si John Terrence Valentino, sang Barangay Lawaan, sining siyudad.
Nahibaluan nga may okasyon ang magpamilya kag naga-selebrar ang mga ini sa nasambit nga lugar sang nag-hagaday ang duha nga magpaligo ang mga biktima.
Ginkakibot na lamang sang iloy ni Valentino sang nakit-an nga yara na sa malayo nga porsyon sang dagat ang mga biktima nga nagabutwa-butwa.
Gilayon nga ginlangoy sang isa pa nila ka himata ang dagat agud masalbar ang mga biktima.
Una nga nasalbar ang napulo ka tuig nga bata apang wala na nakita si Valentino matapos ginhampak sang mabaskog nga balod.
Suno kay Lt. Commander Michael Andag, hepe sang Philippine Coast Guard (PCG-Roxas), nagapadayon sa karon ang ila nga search and rescue operation kay Valentino nga tubtob sa karon nagapabilin pa nga missing.
