PANAY, CAPIZ- Pilason ang isa ka mangunguma matapos natiruhan sang barangay kagawad sa Sitio Tugas, Barangay Linao, Panay, Capiz.
Ang biktima amo si alyas ‘Tonton’, 63-anyos, samtang ang ginatudlo suspek amo si alyas ‘Ale’, kagawad, 63-anyos kag lunsay mga residente sang nasambit nga barangay.
Sa interview sang Bombo Radyo kay Police Chief Master Sergeant Rey Falco, Police Information Officer sang Panay Municipal Police Station, ginpahayag nga samtang padulong kuntani ang biktima sa iya nga uyapad, ginsundan ini sya ni Kagawad.
Dugang pa sini, bangud sa pagsunod ni Kagawad, kaangay ginkurdam si alyas ‘Tonton’ kag nakig-istorya sa Kagawad, apang nagluntad ang isa ka mainit nga komosyon sa magtimbang nga bahin kag hinali nga naghunos sang armas-luthang si Kagawad kag gintiro sang makalima ka beses si alyas ‘Tonton.
Bangud sa pagtiro sang kagawad sa biktima, nag-angkon ini sang pilas sa nawala nga bahin sang iya nga tiil kag sa karon nagapabilin pa sa Roxas Memorial Provincial Hospital, Roxas City.
Nahibaluan nga bangud sa daan nga hiligut-anon, partikular sa natabo sang Mayo 10 sa sini nga tuig sa diin nga ginlampusan suno diri si Kagawad ni alyas ‘Tonton’ ang kabangdanan sang amo nga hitabo.
Samtang, dugang pa ni Falco, nga si Kagawad ang may yara sang record sa ila nga lugar sa diin nga nagapangatubang ini sa kaso sa paglapas sa Republic Act 10591 ukon ang Comprehensive Firearms and Ammunition Regulation Act.
Sa karon, temporaryo ini nga nakahilway bangud sa nagtakop na ang reglementary period sini apang magapangatubang ini sa kaso nga Attemted Homicide.
Interviewed by Bombo Francis Biñas
