ROXAS CITY – Suspendido sang tatlo ka adlaw ang isa ka empleyado sa isa ka establisyimento sa Pavia St. Roxas Avenue sa syudad sang Roxas bangud sa ginapahayag nga paggamit sini sang comfort room (CR).
Personal nga nagpadulong sa talatapan sang Bombo Radyo si alyas “Dodoy”, 27-anyos kag residente sang banwa sang Cuartero nga kun sa diin, ginareklamo sini ang tuman ka strikto nga ginapatuman sang supervisor sang amo nga establiyimento sa mga empleyado nga apisar maggamit sang CR, ginadumilian pa.
Dugang pa ni Dodoy, masobra 100 sila nga mga empleyado, duha lang ka CR ang ila nga ginagamit kag tingub pa ang CR sang babayi kag lalaki. Dugang pa sini nga daw kaangay nga indi maayo tulukon nga ginatingub ang babayi kag lalaki sa paggamit sang isa lang ka CR.
Sa panaysayon ni Dodoy, ginadumilian ang mga ini nga maggamit sang CR bangud may nakita nga ginagamit sang empleyado ang mga items ang pamunuan sang amo nga establisyimento nga ginabasol sa mga empleyado pero wala man suno diri sila sang may ginapakita nga ebidensya nga nagapamatuod ang mga empleyado gid man ang naggamit sang amo nga butang nga posible man nga ginagamit sang customers ang butang sa amo nga CR sa sulod sang establishimento, rason nga ginadumilian na ang mga ini nga maggamit sang amo nga CR.
Pahayag pa sini, damo pa sa mga empleyado ang nagareklamo man bangud sa ila nga sitwasyon sa trabaho.
Mensahe ni Dodoy sa pamunuan sang amo nga establisyemento ilabi na ang ila supervisor, tani indi man pag-gipiton ang mga empleyado, indi pag-daog-daogon nga apisar sa paggamit lamang sang CR, ginadumilian pa. Dugang pa ni Dodoy, bilang empleyado, ginaubra man sang mga ini ang ila trabaho sang insakto.
