ROXAS CITY – Ginpaidalom na ang banwa sang Pontevedra sa state of alert bangud sa Novel Coronavirus (NCOV).
Sa interview sang Bombo Radyo kay Mayor Esteban Evan Contreras, ginpahayag sini, nga may duha ka mga babayi ini nga nangin pasyente sa iya klinika nga nagikan sa Hong Kong nga nakabatyag sang pag-ubo, lagnat kag pagpalanakit sang joints.
Ginpanugyanan sang alkalde ang duha nga pamatyagan ang ila kaugalingon kag sa tion nga maglala ang ginabatyag gilayon nga magkadto sa malapit nga ospital agud magpacheck-up.
Isa ka semana pa lamang ang nakaligad humalin sang nag-abot ang duha sa syudad sang Roxas para magbakasyon.
Nahibaluan nga gintawagan na sila sang ila employer nga magbalik na sa Hong Kong, apang indi pa sila makabalik, bangud sa nagalain nga pamatyag.
Nagapahanumdum si Mayor Contreras sa iya mga constituents na pabaskugon ang ila nga immune system, magkaon sang masustansiya nga mga pagkaon kag prutas kag mag-inom sang madamo nga tubig.
