Nagpatuman ang banwa sang Sigma, Capiz sang four-day duty bilang kabahin sang energy conservation efforts sandig sa Memorandum Circular No. 114 sang Office of the President.
Sa interview sang Bombo Radyo kay Sigma, Capiz Mayor Dante Rizal Eslabon, iya ginpahayag nga sang nabaton niya ang amo nga memorandum, gilayon man niya ini gin-implementar nga nagsugod sang Marso 9.
Suno kay Mayor Eslabon, halin Lunes tubtob Huwebes ang duty sang mga empleyado sang munisipyo nga magasugod sa alas-7:00 sang aga tubtob alas-6:00 sang gab-i, samtang wala na sang opisina kada Byernes.
Dugang pa ni Mayor Eslabon nga agud masiguro ang padayon nga operasyon sang essential services sa publiko, magapadayon sa regular nga working schedule ang mga opisina nga nagahatag sang essential kag frontline services. Lakip diri ang Municipal Health Office, Municipal Disaster Risk Reduction and Management Office, Public Order and Safety Unit, kag Municipal Environment and Natural Resources Office.
Ginpanugyanan naman sang lokal nga gobyerno sang banwa ang tanan nga mga kliyente kag stakeholders nga magplano kag ipa-schedule ang ila pagbisita kag transaksyon suno sa nasambit nga office hours.
