ROXAS CITY – Nangin ika 2 sa may pinakamataas nga kaso sang dengue ang Barangay Milibili sa syudad gikan sa City Health office.
Sa interview sang Bombo Radyo kay Kapitan Anabelle Roxas, Punong Barangay sang Brgy. Milibili, ginpahayag sini nga may yara na sang 8 ka kaso sang dengue sa ila barangay sumugod Mayo tubtob Hunyo kun sa diin 3 sa karon ang aktibo nga kaso.
Suno diri, wala nagauntat ang ila talatapan sa pagtapna sang dengue pinaagi sang search and destroy, clean up drive kag paghatag sang pahanumdom sa mga pumuluyo.
Apelar ni Kapitan sa pumuluyo nga magpanglimpyo sa palibot ilabi na sa mga bahin nga posible istaran sang lamok kasubong sang bakante nga lote nga may mga stagnant water kag limpyuhan ang mansig ugsaran sang balay bangud indi man sarang sang opisyales nga sila pa ang manglimpyo sa bug-os nga barangay.
Dugang pa sini nga kuntani mag-extend pa ang iya termino bilang punong barangay kag luyag pa niya nga magserbisyo sa mga pumuluyo sang Barangay Milibili bangud suno diri sa sulod sang duha ka tuig wala pa nakaimplementar sang proyekto nga luyag niya umpisahan kun mapalawig pa ang iya pagpungko .
Ginapanugyan man ni Kapitan nga magkooperar ang mga pumuluyo sa mga aktibidades sang ila barangay.
