ROXAS CITY-Ginpaidalom sa Modified Enhanced Community Quarantine ukon MECQ sa sulod sang lima ka adlaw ang Barangay Poblacion, Jamindan, Capiz kasunod sang pagpositibo sa COVID-19 sang apat ka mga indibidwal sa nasambit nga banwa.
Ini ang ginkompirmar ni Mayor Mac Arthur Valdemar sang mainterview sang Bombo Radyo.
Ginpahayag ni Valdemar ang mga nagpositibo ang ginakalakipan sang tatlo ka mga empleyado sang munisipiyo kag isa ka katapo sang Philippine Army.
Gin-athag ni Valdemar nga wala naga-istar sa nasambit nga barangay ang apat ka nagpositibo apang masami sa Barangay Poblacion makit-an ang ila mga presensiya.
Samtang nagapadayon naman ang ginapatigayon nga contact tracing sa mga indibidwal nga naka-close contact sa mga nagpositibo.
Nagpanawagan naman si Valdemar sang kooperasyon sa mga pumuluyo agud malikawan ang paglapta sang nasambitan nga virus.
Matandaan nga sandig sa ginpapanaog nga Executive Order ni Valdemar nagsugod ang pagpaidalom sa MECQ ukon lockdown sa Barangay Poblacion humalin kahapon tubtob sa lunes Setyembre 7, 2020.
