ROXAS CITY – Ginpasidunggan sang Brotherhood of Christian Businessmen and Professionals (BCBP) Capiz Chapter ang mga indibidwal nga may dalayawon nga nabuhatan pinaagi sa pagbalik sang mga nakita sang mga ini nga mga cash kag importante nga butang sa El Circulo Convention Center, Pueblo de Panay, Barangay Lawaan, Roxas City.
Ini ang kadungan sang 19th anniversary sang nasambit nga grupo.
Nangin awardees ang mag-asawa nga Engr. Kim Harold kag Atty. Rodelyn Hacermida nga nagbalik sa Bombo Radyo sang cash nga nagalab-ot sa P27, 000 kag importante nga dokumento nga nakasulod sa sling bag.
Nagbaton ang duha sang Plaque of Appreciation kag madamo nga regalo kapareho sang free dental service, insurance, free overnight stay sa Isa ka kilala nga hotel sa Roxas City kag madamo nga iban pa.
Kalakip man sa mga awardees ang tricycle driver nga si Melvin Aguro nga nagturn-over sang P180, 000 sa Roxas City Police Station nga nagbaton man sang kasubong nga pasidungog kag insentibo.
Ini nga hilikuton ang tuigan na nga ginahiwat sang BCBP sa idalom sang “Be Honest” campaign sini.
Sa sini nga pamaagi ma-engganyo ang aton mga kauturann nga magpakita sang pagkatampad pinaagi sa pagbalik sang napulot nga mga pagkabutang.
