ROXAS CITY – Aminado ang Provincial Operations Officer sang Bureau of Fire Protection Capiz nga ginpapanaogan sang memorandum ang Pilar Municipal Fire Station bangud sa ginaalegar sang anay alkalde nga si Ike Patricio nga pagka-arogante kag kapaslawan nga himoon ang pangabay nga magresponde sa nasunog nga katubuhan sa Barangay Jolongajog, Pontevedra nga nga iya ginapanag-iyahan.
Ini ang ginpahayag ni SFO2 Marlon Garbo sang ma-interview sang Bombo Radyo.
Suno kay Garbo nga ginpapanaugan sang memorandum ang mga fire officers nga naka duty sang Pebrero 2, agud mahibaluan kun may yara sila sang kapaslawan sa ginapangabay nga magresponde sa amo nga sunog.
Apang gin-athag ni Garbo nga wala pa sang may nabaton nga complaint ang ila nga talapatan nagikan kay Patricio.
Ginklaro ni Garbo nga may yara sang standard operating procedure nga ginasunod ang kada fire station sa tion nga magresponde sa sunog.
Samtang may yara naman sang salabton ang mga fire station sa tion nga wala sang clearance nagikan sa provincial fire marshall nga magresponde sa sunog nga wala naman ginapangayo ang ila nga atensyon sang ground commander.
Ini bangud makabig ini nga abandonment of post kun may yara sang sunog nga magluntad sa iya area of responsibility.
Nagpanugyan si Garbo sa publiko nga kun may yara sang makita nga kapaslawan kag kakulangan sa mga fire officers sa tion sang ila nga pagresponde, mahimo man nga maka complaint ang bisan sino nga indibidwal.
Mahibaluan nga desidido nga magpasaka sang panumbungon si Patricio matapos nga nadismaya ini sa nangin aktwasyon sang mga bombero sa amo nga talatapan.
