ROXAS CITY – Kapin sa 300 litro nga gasolina ang nakumpiskar sang Bureau of Fire Protection batuk sa nagabaligya sang tiningi nga gasolina sa San Roque extension, Barangay Dumolog kag Baybay kaina sang aga.
Ginpahayag ni Fire Senior Inspector Stephen Jardeleza, fire marshall sang Roxas City fire station ginpatigayon ang operasyon bilang sabat sa ginapalab-ot nga reklamo sa talatapan angut sa pagduging sang mga nagabaligya sang bote bote nga gasolina nga nagabutang sa peligro sa kabuhi sang mga pumuluyo.
Aminado si Jardeleza nga madamo na sila sang nabaton nga reklamo gikan sa mga concerned citizen nga nabalaka sa katalagman nga posible matuga sa pagbaligya sang tiningi nga gasolina sa dalanon.
Suno sa opisyal nga lunsay mga gasolina ang ila nakumpiskar sa mga 1st time vendors sang bote bote nga gasolina, magluwas pa sa paraphernalia kag empty containers.
Nagapati man si Jardeleza nga indi mapauntat ang iligal nga pagbaligya sang mga tiningi nga gasolina, bangud kulang sa mekanismo kag implementasyon ang karon nga ordinansa.
Apang nagapati ang opisyal nga pananglitan maaprubahan sang konseho sang syudad ang ginaduso nga ordinansa may obligasyon na ang barangay nga mapabayad ang mga naglapas diri kag kun sa sulod sang tatlo ka adlaw kag mapaslawan sila nga makabayad mahimo na nga makapasaka sang panumbungon ang BFP batuk sa mga salawagon nga nagabaligya sang tiningi nga gasolina.
Samtang ginpanindugan pa sini nga pinaagi sa bag-o nga komprehensibo nga ordinansa nga may ngipon kag mapag-on nga mekanismo matigayon nga mapapanaugan sang penalidad ang mga violators.
Iga-turn over sang BFP ang nakumpiskar nga mga gasolina sa motorpool sang syudad sang Roxas.
