ROXAS CITY – Under maintenance ukon may samad ang firetruck sang BFP Pontevedra sa nagluntad nga sunog kagab-i sa Barangay Ilaya banwa sang Pontevedra.
Ini ang ginpahayag sang katapo sang BFP Pontevedra sang napakig-angutan sang Bombo Radyo.
Suno diri, asud-asud nga aktibidades ang ila ginhimo gamit ang nagaisahanon nga firetruck rason nga nasamad ini kag wala pa nahibaluan kun san-o makay-o.
Mahibaluan nga nauna pa responde ang BFP Panit-an, Maayon kag Panay nga amu ang nagbuligay sa pagtapna sang sunog.
Sa inisyal nga imbestigasyon sang BFP Pontevedra, kapin P130,000 ang kahalitan sang sunog kag posible open wire sa atop sang nasunugan ang gintunaan sang insidente, apang padayon pa sa karon ang ila imbestigasyon.
Matandaan nga 2 ang totally samtang 1 naman ang partially burned nga puluy-an nga ginapanag-iyahan nanday Ronaldo Dorado, Jinky Aligno kag Lilian Penequito.
Sa karon, gina-asister sang LGU Pontevedra ang mga nasunugan agud mahatagan sang nagaka-igo nga bulig.
