Naghakot sang nagkalain-lain nga mga awards ang Bureau of Fire Protection Western Visayas sa kakatapos lang nga 10th National Fire Olympics 2026 nga ginhiwat sang Marso 24 tubtob 26, 2026 sa Oroquieta City, Misamis Occidental.
Sa interview sang Bombo Radyo kay Fire Officer 2 Cherie P. Barros Jr. sang Bureau of Fire Protection Roxas City iya ginpahayag nga ang amo nga kahiwatan ang ginapatigayon kada bulan sang Marso kadungan sang Fire Prevention Month.
Sa probinsya sang Capiz, apat sila ang nangin representante sa amo nga kompetisyon sa diin upod sini sanday Fire Officer 2 Marie V. Cornelio sang Ivisan BFP, Fire Officer 1 Rhiezel Joy Gregorio sang Dao BFP kag Fire Officer 2 Rojan A. Guillermo sang Roxas BFP.
Suno kay Barros, ang amo nga aktibidad sang ahensya naga-assess sa tagsa ka mga katapo sang bombero kun sing-ano ka preparado kag maalam pag-abot sa paghatag sang bulig sa tion sang emerhensya.
Nahibaluan nga madamo sang mga aktibidad kag pahampang ang ila gin-intrahan kun sa diin ginapasakupan ini sang mga contingents nagikan sa 18 tanan ka mga rehiyon sa Pilipinas.
Pila sa mga aktibidad amo ang Life Extrication Challenge sa diin nga nakuha nila ang Champion title nga may gold medal, Rope Rescue Challenge, Toughest Firefighter-bronze medal kag Tug of War nga bronze medal man. Samtang, nagrekord sa 1st Place ang bug-os nga Region 6 Western Visayas nga may Silver Medal.
Ang contingents sang Western Visayas ginapasakupan sang pili nga mga bombero halin sa Capiz, Iloilo, Guimaras kag Aklan.
Nagapasalig naman ang natungdan sa mga pumuluyo sa probinsya sang Capiz nga ang Bureau of Fire Protection bukas gid sa paghatag sang bulig sa tion sang mga emerhensya.
