ROXAS CITY – Apektado ang bilog nga banwa sang Dumarao sang nagapadayon nga El Nino nga na-eksperyensyahan sang probinsya.
Sa interview sang Bombo Radyo kay Dumarao Mayor Mateo Hachuela, ginsiling sini nga gin-isa-isa nila ang mga kabarangayan kag ginpahimo sang official report kung anu ka kadako ang halit sa ila dala sang tag-ilinit partikular ang mga mangunguma.
Suno kay Mayor Hachuela, sa 33 nga mga barangay 2 na lamang ang wala pa nakasumiter sang ila report.
Sa inisyal nga report sang ila munisipyo yara sa masobra 6,000 hectares ang apektado sang tag-ilinit kung sa diin pinakadako sa karun nga problema sang pila ka mga barangay ang kakulangan nga suplay sang tubig.
Pahayag sini nga ang iban nagabakal na lamang sa mga water refilling station apang ang iban nga malayo sa banwa naga-antos kung sa diin magakuha sang tubig nga gamiton sa ila pang-adlaw-adlaw nga kinahanglanon.
Bangud sini, nagpakig-angut ang alkalde sa Bureau of Fire Protection (BFP) Dumarao kag naghinyo nga kung mahimo kung bakante lamang ang ila fire truck padulungan kag hatagan sang suplay sang tubig ang mga barangay nga nagakinahanglan.
Dugang pa ni Mayor Hachuela, bangud isa na ang ila banwa nga ginpaidalum sa State of Calamity ginsiguro sini nga ang tanan nga pumuluyo makaganar sang ayuda partikular sang mga food packs.
Agud malikawan ang paglainay sang buot sa mga makabaton kag indi makabaton sang amu nga ayuda, ginpakamaayo sini nga maga-agi sa maid-id nga survey ang mga pangalan nga ilista agud mapamatud-an nga sila ang nagakadapat nga makabaton sini.
