ROXAS CITY – May limitasyon ang pagserbisyo sang mga birthing clinic, bangud para gid lamang ini sa mga babayi nga makabig ‘low risk’ ang pagbusong.
Sa interview sang Bombo Radyo kay Dra. Maria Teresa Tan, Municipal Health Officer sa banwa sang Sigma, ginpahayag sini nga regulated sang Department of Health (DOH) ang ila nga pampubliko nga birthing clinic.
Suno pa diri nga makabig low risk ang ginabusong sang pasyente kun ini ang ila ikaduha tubtob ikaapat nga bata.
Nagakahulogan nga ang mga yara sa high risk nga mga Iloy ang ginaabisuhan nga mas maayo kun sa ospital na magbun-ag.
Ang mga high risk amu ang mga nagabusong nga naga-edad 18-anyos panubo kag 35-anyos pataas, may mga balatian kag ang mga nagabusong sa ila una kag ikalima nga bata.
Ginsiling man sini nga libre ang pagbata sa mga pampubliko nga birthing clinic kun may yara sang PhilHealth ang Iloy, apang kun wala, ginatinguhaan sang ila munisipyo nga ma-apply sa point of care, agud makahagan-hagan sa gasto.
Nahibaluan nga rehistrado ang ila birthing clinic sa banwa sang Sigma.
