ROXAS CITY – Hustisya – ini gid lamang ang luyag maangkon sang Sangguniang Panlalawigan sa Executive Department rason nga nagpatigayon ang mga ini sang tikang nga pagaimbestigahan ang Gobernador, Administrador kag OIC sang RMPH.
Ini ang ginpahayag ni board member Jonathan ‘Sonny’ Besa, chairman sang committee on appropriations, sang mainterview sang Bombo Radyo.
Ginklaro sini nga wala sila nagapamulitika kag ginahimo gid lamang nila ang trabaho bilang yara sa legislative department, nga amu ang protektahan ang kuwarta sang pumuluyo.
Dugang pa sini, kun nahimo sang iban nga district hospital nga magsumiter sang ginahinyo nila nga dokumento, ngaman indi mahatag sang Roxas Memorial Provincial Hospital (RMPH).
Bangud sini, wala napunggan ni League of the Municipalities (LMP) President Leodegario ‘Jun’ Labao, Jr nga magpahayag sa kahanginan sang iya opinyon kag suhestiyon sa nagakahinabo sa tunga sang duha ka departamento sang gobyerno-probinsyal.
Suno diri, natak-an na ini magpamati sa tagsa-tagsa nga kampo sang ila mga pahayag, bangud pabalik-balik gid lamang ang ila panindugan.
Suhestiyon ni Labao nga kuntani ang ipatawag sang legislative department indi ang mga department heads kundi ang auditor, agud mahibaluan kun may yara bala sang pagpangawat sa pondo sang gobyerno.
Pabor man ini nga kasuhan ang Gobernador, ina kun mapamatud-an ang ila alegasyon nga may yara sang kurapsyon, agud suno diri matapos na, bangud ang nagasupreher amu ang pumuluyo sang Capiz.
