ROXAS CITY- Ginpanginwala sang Chairman sang Committee on Rules sang Sangguniang Panlalawigan nga gin-atake sini si Board Member Eleuper Martinez.
Suno kay Board Member Atty. Matthew Hachuela, wala ini makadumdum nga gin-atake sini si Martinez kabaliskaran sang alegasyon sang nasambit nga Board Member sa baylo nga mismo si Martinez suno diri ang nagpakita sang pagkabastos.
Ginpahayag sini nga kinahanglan na nga magpakonsulta ni Martinez sa Psychiatrist agud sarang nga mabulong ang problema sini sa pang-ino-ino kag ma-manehar ang emosyon sa tion nga nagapangakig ini.
Gindugang pa sini ang mga ginbuya ni Martinez nga alegasyon batuk sa iya kag kay Vice Governor Jaime “Mitang” Magbanua ang lunsay tanan indi salapakon nga klase sang butang.
Suno diri nga kun pag-abot sa pag-release sang RATA ni Martinez wala man ini sang dapat nga salabton bangud ang bise gobernador lamang ang sarang makadesisyon pag-abot sini.
Ginapahayag nga nangin maayo ang pagplastar sini sang Committee Report bangud na-establisar sini ang tanan nga mga nagkalatabo sa ginpatigayon nga Committee Hearing rason nga ini ang ginpirmahan ni Board Member Ricky Martin kag ginpirmahan sa plenaryo.
Gindugang pa sini nga posible naglingin ang ulo ni Martinez rason nga wala sini maintindihan ang nasaad sa Committee Report bangud nakaligad lamang ini nga bulan makapauli gikan sa pila ka bulan nga pagtinir sa Metro Manila.
Ginkatingala man sini kun ngaa ginboto sang mga pumuluyo sa segundo distrito si Martinez nga sarang indi man sini maubra ang trabaho bilang isa ka Board Member.
Ginsabat man ni Hachuela nga dapat 2/3 ka mga boto nagikan sa mga Board Members ang sarang makadeklarar nga ipabakante ang opisina sini sandig sa petisyon ni Martinez nga maga-resign nalang ini.
