ROXAS CITY – Palaisipan sa board member sa probinsiya sang Capiz ang ginhimo nga secret voting sang mga katapu sang Commission on Appointment sa kumpirmasyon ni anay DENR Secretary Gina Lopez.
Ginakwestyon ni BM Jonathan Sonny Besa ang pamaagi sang pagboto sang mga katapu sang CA nga ginakunsidera sini nga highly unusual.
Sa interview sang Bombo Radyo kay BM Besa, ginpahayag sini nga bangud indi kumbinsido sa pamaagi nga ginpatigayon sang miyembro sang CA sa pagbasura sa appointment ni Lopez nagpamanagkot ini kay anay Capiz 1st distrcit Congressman kag karon Governor Antonio del Rosario nga miyembro sadto sang CA kun normal lamang ang nahinabo nga secret voting sa kumpirmasyon sang isa ka sekretaryo.
Ginpalab-ot kay Besa nga indi ini dapat ginhimo bangud nadula ang transparency sa pagboto sang mga miyembro sang CA.
Samtang sa pihak nga dismayado ini sa pagbasura sang CA sa appointment ni Lopez, saludo ini sa gihapon bangud sa ginpakita nga kaisog kag panindugan batuk sa iresponsable nga pagmina.
