ROXAS CITY – Ginapangunahan sang chairman sang Committee on Finance and Appropriations ang pagpatigayon sang marathon budget hearing agud matalakay ang proposed budget sang tagsa ka departamento para sa 2020.
Suno kay BM Jonathan “Sonny” Besa, Disyembre 5 sang ginsuguran ang budget hearing sa diin 18 na ka mga opisina sa kapitolyo probinsiyal ang natapos kag 15 na lamang ka mga department ang nabilin.
Gin-athag ni Besa nga wala ginahiwat sa sulod sang probinsyal capitol ang mga public hearing bangud indi luyag sang provincial board nga madisturbo sa ila agud mahatagan sang atensyon ang mga ginplastar nga budget sang kada departments heads.
Nagapasalamat si Besa sa kada department heads bangud ila gintun-an ang pagpresentar sang ila nga mga pondo rason nga nangin madasig ang pagtalakay sini.
Apang talalupangdon nga may pila ka mga department heads nga wala madepensahan ang ginaproponer nga pondo sang ila nga departamento rason nga gina-obligar nga magsumiter sang ila nga revisions pinaagi sa written explanation.
Apisar nga tuman ka gamay ang oras agud matun-an kag matutokan sang provincial board ang mga ginsumiter nga mga proposed budget sang kada departamento, ginpasalig ni Besa nga ila ginpaidalom sa ma-id-id nga pagpamangkot ang mga department heads.
Target sang provincial board nga mapapasar ang proposed 2020 annual budget sang probinsya sa Disyembre 20 sini nga tuig.
Nagapangayo si Besa sang kooperasyon sa executive department agud ma-pagplastar ang ila nga budget.
Gina hinyo ni Besa nga kinahanglan ang presensiya sang tanan nga mga department heads para sa pinal nga budget hearing.
Ginapasalig ni Besa sa publiko nga ila ginatun-an ang mga ginsumiter nga proposed budget sang kada department heads kag naga-agi sa ma-id-id nga ebalwasyon.
Sa karon indi pa matumod ni Besa kun may yara sang mga pondo sang tagsa ka departamento nga dapat buhinan.
