Roxas City – Isa sa nangin mainit nga topiko sa ginpatigayon nga session ang proposal sang gobernador ang pagpirma sang gindonar nga duta sang Pamilya Ong sa gobyerno probinsiyal nga plano patindugan sang Capiz Convention Center.
Gintalakay sa session ang request ni Governor Esteban Evan Contreras II nga aprubahan ang deed of donation sang Pamilya Ong sa provincial government.
Apang madamo nga mga board members ang nagkwestyon rason nga gin-hold na lamang ini.
Suno kay Board Member Thea Faith Reyes nga luyag sini matul-id kun masarangan sang probinsiya ang pagpatukod sang Capiz Convention Center nga may 5,000 sitting capacity nga kun tan-awon mas dako ini kun ikumpara sa Iloilo Convention Center.
Ginklaro ni Reyes nga wala ini nagapamalabag sa luyag sang gobernador bangud plano man sadto sang Del Rosario administration nga magtukod sang Capiz Convention Center.
Nagapati si Reyes nga wala sang bastante nga pondo ang probinsiya sa pagpatindog sa amo nga edipisyo kag wala sang madamo nga mga hotels kag restaurants nga maga-akomodar sa mga bisita.
Wala man nalikawan nga makumpara ni Reyes ang Capiz sa Iloilo sa diin sa kabug-usan nagapanindugan ini nga indi pa ini ang nagakaigo nga tion agud makapatindog sang Capiz Convention Center sa probinsiya.
Nagpanugyan man ini sa gobernador nga indi lamang magdali bangud ila pa pagatun-an sa provincial board ang request ni Governor Esteban Evan Contreras II.
