“Indi nko pagdakpa kay hatagan taka P500”
Ini ang mga tinaga nga ginaalegar ginpahayag sang Barangay Peacekeeping Action Teams (BPAT) member sa isa ka traffic auxiliary, matapos nga gindakop ini bangud sa paglapas sang traffic rules.
Sandig sa ginpabalhag sang tagreklamo nga si Ace Espino, traffic enforcer kag residente sang Brgy. Tanque, sini nga syudad, ginpahayag sini nga nagapatigayon ang mga ini sang implementasyon sang Traffic Rules and Laws sang City Ordinance 042-2002, kaupod ang Highway Patrol Group (HPG), alas-9:20 sang aga, Pebrero 22, sa Hemingway St., Brgy. 11, Roxas City, sang na-apprehend ang BPAT member nga si Roberto Bengan, 53-anyos nga residente sang Brgy. Dinginan, sini nga syudad.
Ginpahayag nga ginparahan si Bengan bangud sa indi mabasahan nga plate number kag sa pagtsekyar wala ini sang driver’s license.
Ginaalegar nga nagtan-ay ang driver sang P500 nga kuwarta bilang suhol sa traffic auxiliary agud indi ini pagdakpon.
Apang, nagsabat ang traffic auxiliary nga ang isuhol sini, ibayad nalang sa City hall bangud sa iya traffic violation.
Bangud sini, nagpa-assister ang traffic auxiliary sa katapo sang pulis agud arestuhon ang nasambit nga BPAT member kag sa karon natalanan ini nga pasakaan sang panumbungon nga Bribery, kag nagapabilin sa Roxas City Police Station para sa nagakaigo nga disposisyon.
