DAO, CAPIZ- Pilas sa lawas ang naangkon sang isa ka BPAT, matapos aksidente nga nalukpan sang iya ginasukbit nga armas-luthang, sa Barangay Bita, Dao, Capiz.

Ang biktima amo si alyas “Dodoy”, 57- anyos, kag residente sang nasambit nga lugar.

Sa interview sang Bombo Radyo kay Police Captain Rian Ampoyos, Officer in charge sang Dao Municipal Police Station, ginpahayag nga base sa ginpatigayon nila nga imbestigasyon, nakabati suno diri ang mga kabataan sang biktima sang lupok sa sulod sang ila nga puloy-an, kag sa pagchekyar sang mga ini, nakit-an nalang nila nga nagahigda ang biktima nga may dugo sa nawala nga portion sang iya nga paa, matapos nga ginaalegar nga aksidente nga nalukpan sang ginasukbit nga 12 gauge shotgun break type nga armas-luthang.

Gilayon naman nga ginrespondihan sang mga katapo sang kapulisan, Municipal Disaster Risk Reduction Management Office-Dao kag Dao Emergency Response Unit (DERU) kag ginpadapatan sang pauna nga pagbulong antes nga ginpadangat sa ospital para sa dugang nga pag-atipan.

Samtang, gilayon naman ginsungka sa mga kapulisan ang armas-luthang, para sa nagakaigo nga disposisyon.

Interviewed by Bombo Francis Biñas