ROXAS CITY — Nagapabilin nga kalmado kag kumpiyansa ang Business Process Outsourcing (BPO) industry sa Pilipinas sa pihak sang hagna nga ginaduso sa Estados Unidos nga nagatuyo nga punggan ang pagbalhin sang call center jobs sa lain nga pungsod.
Ang nasambit nga hagna, ginatawag nga “Keep Call Centers in America Act of 2025,” ang gin-file nanday US Senators Ruben Gallego kag Jim Justice. Katuyuan sini nga maproteheran ang mga mamumugon nga Amerikano pamaagi sang pagpabilin sang mga trabaho sa sulod sang pungsod kag pagpamalabag sa offshore outsourcing.
Sa interview sang Bombo Radyo Roxas, ginpahayag ni Joeven Tansi, Executive Director sang Iloilo Federation for Information Technology, nga wala ini ginakabig nga pagpanghangkat sa lokal nga industriya.
Suno sa iya, nagapabilin nga mabaskog ang Business Process Outsourcing (BPO) sector sa Pilipinas bangud sa padayon nga paghanas kag pagpalapad sang ihibalo sang mga mamumugon nga Pilipino.
Dugang pa sini, ang matuod nga pagpanghangkat sa industriya indi ang mga layi nga ginapatuman sa iban nga pungsod kundi kun paano makasabay ang Pilipinas sa madasig nga dalagan sang global nga inobasyon kag digital transformation.
Nagapati man si Tansi nga magapabilin nga isa sa mga nagapanguna nga source of income sang pungsod ang Business Process Outsourcing (BPO) sa masunod nga 10 tubtob 15 ka tuig.
Interviewed by Bombo Jessa Mae Siman De Los Santos
