ROXAS CITY – Ginreklamo sang isa ka barangay kagawad ang mga ka-updanan sini nga mga barangay officials matapos nga ginsinggitan kag gintiklod ini sa barangay hall sang Barangay Canapian, Maayon, Capiz.
Suno kay Barangay Kagawad Romulo Ciudad gulpi na lamang siya nga gintawag sang iya mga kaupdanan kag ginsinggitan ni Barangay Kagawad Virgilio Descalsota kag ni Punong Barangay Randy Aguillar.
Dugang pa sini nga gintiklod pa siya ni Descalsota sa sulod mismo sang barangay hall.
Wala gid nagbalos si Ciudad kag ginsabat lamang sini nga magrespetohanay lamang sila.
Bangud sa natabo ginpabalhag ni Ciudad sa Maayon Municipal Police Station ang natabo kag ginreport sa talatapan sang Department of Interior and Local Government (DILG).
Ginapahayag nga naakig ang nasambit nga mga opisyales kay Ciudad bangud sa pagpamalabag sini sa paggamit sang calamity fund sa pagbakal sang BPAT motor patrol sang barangay.
