ROXAS CITY – At-large sa karon sa mga kapulisan sa Tapaz ang isa ka Barangay Kagawad, matapos nga ginatudlo suspek sa pagpangluthang sa isa ka soltero, sa Brgy. Roxas, Tapaz, Capiz.
Ginkilala ang suspek kay Brgy. Kgwd. Gilbert Ganat Galagate, 40-anyos.
Sa inisyal nga impormasyon nga nakuha sang Bombo Radyo sa Tapaz MPS, nga alas-10:30 kagab-i sang Domingo, sang naga-inom-inom sa balay sang mga biktima nga sanday Jason Dave Decipulo, 22-anyos soltero kag Carlo Bulyag, 30-anyos, lunsay mga residente sang nasambit nga barangay kaupod ang ila mga abyan, sang hinali nga may nabatian ang mga ini nga lupok sang armas-luthang, kag sa ila pagguwa, nakit-an nila ang suspek.
Diri kag nagluntad ang komprontasyon, sang hinali nalang nga nagbunot sang wala mahibaluan nga sahi sang armas-luthang ang kagawad kag ginluthang sang makaduha ka beses si Bulyag, apang wala ini maigu, sa baylo, si Decipulo ang naiguan sa iya nawala nga bahin sang tiyan.
Ginpadangat pa sa Tapaz District Hospital si Decipulo apang gindeklarar ini nga dead on arrival sang doktor.
Ginalantaw nga motibo amu ang daan nga hiligut-anon.
Nagapadayon ang imbestigasyon sang mga kapulisan sa insidente.
