Pabor ang mga opisyal sang Barangay Baybay, Roxas City sa ginpaguwa nga Memorandum Circular No. 2026-009 sang Department of the Interior and Local Government (DILG) ukon ang “Encouraging the Enactment of Local Ordinances for Safer Cities: A Call to Actions for Local Government Units”.
Sa interview sang Bombo Radyo kay Punong Barangay Erwin Oroceo sang amo nga barangay, iya ginpahayag nga manami ang amo nga programa agud nga mas mangin organisado kag disiplinado ang mga pumuluyo.
Suno kay Oroceo, kasunod sang pagapanaog sang DILG sa amo nga kasuguan, gilayon ini nga nagpatawag sang pagsinapol kaupod ang iban pa nga mga opisyal kag iban pa nga mga natungdan agud mapahibalo sa mga residente kag mapatuman sang husto ang amo nga mandatu.
Pahayag niya, sang wala pa ang amo nga mandatu, masami nila nga nagakadakpan ang mga pamatan-on nga nagalagaw sa kagab-ihon, subong man nga naga-inom sa higad sang karsada nga wala sang mga bayo
Sa amo nga mga hitabo, ginadala ang mga nagkaladakpan sa crisis center agud kuntani nga mahatagan sang aksyon apang pagkasunod nga adlaw hilway naman kag liwat nga nagapatigayon sang mga ginadumilian nga buluhaton.
Nahibaluan nga amo ang kasuguan ang ginpaguwa sang DILG sang Abril 8, 2026 pamaagi kay Sec. Jonvic Remulla.
Nagapanawagan naman ang natungdan sa mga pumuluyo sini nga nasakupan nga magkooperar kag magsunod sa amo nga mandato agud makalikaw sa kun ano nga mga penalidad.
Interviewed by Bombo Gen Arcosa | via Zona Libre
