ROXAS CITY-Natapos na ang ginpatigayon nga budget hearing sang Sangguniang Panlalawigan para sa Annual Investment Program sang probinsiya sang Capiz sa madasun nga tuig 2021.
Ini ang ginkompirmar ni Board Member Jonathan Besa sang mainterview sang Bombo Radyo.
Ginpahayag ni Besa nga magapabilin nga status quo ukon wala sang may ginbag-o sa pondo sang kada talatapan sang probinsiya magluwas gid lamang sa pondo sang CAPENRO nga ginbuhinan sang P1 milyones para sa dugang nga pondo nga ginpain para sa pagbakal sang bakuna batuk sa COVID-19.
Ginpasalig ni Besa nga may yara sang kapin P32 milyones ka pesos nga pondo ang probinsiya para pambakal sang bakuna batuk sa amo nga balatian.
Ginkumpirmar man sini nga gina-aprubahan na ang kapin P41 milyones nga pondo para sa CNA kag Cash Bonus para sa mga regular kag casual nga mga empleyado sang probinsiya kun sa diin P25 Milyones diri ang gina-alokar para sa (CNA) para sang mga regular nga empleyado kag P15 milyones para sa cash bonus para sa mga casual, job hires kag contractual nga mga empleyado sang probinsiya.
Bangud wala na sang problema kag plastado na ang amo nga pondo, ginpasalig naman ni Besa nga mapapasar na ang amo nga Annual Investment Program sang probinsiya sa madasun nga session sa madasun nga semana.
Mahibaluan nga kapin P1.9 Bilyones ka pesos ang gin-alokar sang probinsiya para sa Annual Investment Program (AIP) sa madasun nga tuig 2021.
