Ginalauman nga maganubo ang presyo sang mga produkto nga petrolyo sa masunod nga semana matapos ang duha ka asud-asod nga semana nga pagtaas.
Base sa forecast sang DOE-OIMB, ang presyo sang gasolina ang maganubo sang P0.25 tubtob P0.70 kada litro, diesel maganubo sang P0.30 tubtob P0.80 kada litro, kag kerosene maganubo sang P0.50 tubtob P0.70 kada litro.
Ang mga kompanya sang langis kalabanan nagaanunsiyo sang price adjustments kada Lunes, kag ginapatuman pagka-sunod nga adlaw.
Sadtong Martes, Abril 29, ang presyo sang kada litro sang gasolina nagtaas sang P1.35, diesel nga nagtaas sang P0.80, kag kerosene nga P0.70.
Sumugod sang nag-umpisa ang tuig, ang presyo sang gasolina kag diesel ang nagtaas na sang tig-P3.65 kada litro, kag kerosene nga P2.50 kada litro tubtob Abril 29.
