ROXAS CITY – Nagpaathag ang General Manager sang Capiz Electric Cooperative (CAPELCO) natuhoy sa pag-utod sa linya sang kuryente sa bug-os nga Barangay Bantigue, Panay, Capiz.
Suno kay Engr. Edgar Diaz, may yara sang gintukod nga Barangay Power Association (BAPA) agud mag-facilitate sa pagreading sang metros, magkolekta sang kada bulan nga koleksyon kag maghatag sang notice of disconnection sa mga residente nga wala nakabayad.
Apang suno diri, napaslawan ang BAPA in-charge sang nasambit nga lugar nga maghatag sang listahan sang wala nakabayad sa kuryente.
Magluwas diri, napaslawan man ini magremit sang iya monthly collection para sa bulan sang Oktubre.
Bangud sini, napilitan ang ahensya nga utdon ang suplay sang kuryente sa nasambit nga lugar matapos nga nagpinasalig ang BAPA apang wala sa gihapon nagapadulong sa ila talapatan.
Pahayag ni Diaz, gilayon man nga ginreconnect ang suplay matapos nga nagsapol ang BAPA in-charge kag nagremit sang koleksyon sa bulan sang Oktubre.
