ROXAS CITY – Ginpaathag ni Capiz Environment and Natural Resources Office (CAPENRO) head Atty. Emilyn Depon ang katuyuan sang pagpatindog sang Ecological Solid Waste Management sa Barangay Acbo, Sigma, Capiz.
Suno kay Depon nga antes ini ginduso ang nasambit nga plano ginpaintiendi kag ginhinalaan na nila ini kaupod ang pila ka mga opisyal sang banwa ukon LGU’s subongman ang tagsa ka mga opisyales sang barangay.
Ginpahayag sini nga ang plano nga pagbakal sang probinsya sa amo nga lote amo ang mapatindogan sang ginatawag nga Ecopark kag mahagan-hagan man ang pagtinambak sang mga basura sa probinsya.
Dugang pa sini nga ang mga basura nga dal-on diri ang iga-recycle man ukon sarang mabaligya kag mahimo pa maggamit bilang organic fertilizer ukon farming gamit ang isa ka machinery sang technical working group.
Dapat kuntani suno kay Depon nga tanan nga mga LGU’s may yara sang tagsa ka mga Ecological Solid Waste Management Facility agud indi na magtambak pa ang mga basura sa ila tagsa ka mga banwa.
Samtang, gindugang pa sini nga masobra 20-anyos na ang laye apang ang implementasyon tuman pa kahina rason nga ginamonitor ang mga open kag close dumpsite sa tagsa ka mga munisipyo agud hatagan sang importansya ang RA 9003 ukon Ecological Solid Waste Management Program sa probinsya.
Mahibaluan nga halos tanan nga mga kabanwahanan ang wala sang final disposal facility magluwas lamang sa siyudad sang Roxas.
