ROXAS CITY – Ginpadulungan na sang Capiz Provincial Environment and Natural Resources Office kag Department of Environment and Natural Resources – Environmental Management Bureau ang ginareklamo nga operasyon sang quarry sa Brgy. Malocloc Sur, Ivisan, Capiz.
Matandaan nga ginareklamo sang pila ka pumuluyo ang amo nga quarry operation bangud nagasulod ang tubig kag lapok sa pila ka panimalay kag subong man nahadlok sa posibilidad nga landslide.
Sa interview sang Bombo Radyo kay Hon. Allan Delos Santos, Punong Barangay sang nasambit nga lugar, ginpahayag sini nga nagpadulong kahapon ang CAPENRO kag DENR-EMB kun sa diin nagpatigayon ang mga ini sang inspeksyon sa lugar agud makit-an kun may posiblidad nga magka-landslide sa operasyon sang quarry.
Dugang pa sini nga ginpadulungan man kag gin-storya ang mga tag-iya sang duha ka balay nga apektado sang amo nga quarry.
Sa karon wala pa sang ideya si PB Delos Santos kun ipauntat ang operasyon sang quarry apang padayon nila ini nga gina-monitor sang mga opisyal.
Ginpahayag pa sang Kapitan nga may benepisyo ang Barangay kag nagpromisa man si Mayor Ipe Yap nga kun may maapektuhan nga dalan iya man ini ipakaayo.
Nahibaluan nga ginapanag-iyahan ni Mayor Yap ang amo nga duta kag nakapangalan ang quarry permit kay Julie Ann Azarcon.
