ROXAS CITY-Nagapabor si Capiz 1st District Congressman Emmanuel “Tawi” Billones Sr. sa pagpamalibad sang gobyerno sang siyudad sang Roxas nga gamiton ang Capiz National High School nga quarantine facility sa mga magapauli nga Overseas Filipino Workers (OFW’s) sa probinsiya sang Capiz.
Ginpapahayag ni Billones nga nahangpan sini ang nangin desisyon ni City Mayor Ronnie Dadivas bangud luyag gid lamang sang alkalde nga maamligan ang ikaayong lawas sang mga pumuluyo sa siyudad batuk sa coronavirus disease (COVID-19).
Suno pa sa iya nga madasig nga magalapta ang virus sa tion nga may magpositio sa mga (OFW’s) bangud madamo man nga panimalay sa palibot sang nasambit nga buluthuan.
Apang ginpasalamatan man sini Capiz Governor Esteban Evan ‘Nonoy’ Contreras
nga amo ang nagpangita sang pamaagi agud makapauli ang nasambit nga mga (OFW’s) sa probinsiya.
Nag-apelar man si Billones sa mga lokal nga gobyerno sang probinsiya nga likawan ang pagbinasulay sa subong nga nagapangatubang sa COVID-19 pandemic.
Samtang gindayaw naman ni Billones ang bug-os nga lokal nga gobyerno sang probinsiya kasunod sa pagpaidalum na sang Capiz sa General Community Quarantine sumugod sa May 1, 2020.
