ROXAS CITY – Desidido nga mag-upod si Capiz 2nd district Board Member Eleuper ‘Bulilit’ Martinez sa patigayunon nga Strategic Planning Seminar kag Executive Legislative Agenda (ELA) sang gobyerno-probinsiyal sa Davao City.
Sa interview sang Bombo Radyo kay Martinez, ginpahayag sini nga natingala siya sa iya iban nga kaupdanan sa Sangguniang Panlalawigan nga indi mag-upod bangud tuman ka importante ang nasambit nga aktibidad ilabi pa nga pagahinalaan naman ang pondo para sa tuig 2020.
Kuntani suno sa opisyal ikonsiderar man sang mga kaupdanan sini ang pagtambong sa nasambit nga aktibidad kag ipaiway ang iban nila nga lakat kun indi man ini tuman ka importante.
Naghatag man sang reaksiyon si Martinez natuhoy sa indi pagtambong ni Vice-Governor Jaime ‘Mitang’ Magbanua sa amo nga aktibidad bangud may pagatambungan man ini nga sinapol sang Grains Retailers Confederation (GRECON).
Suno kay Martinez nga kuntani wala na lang nagpapili sa pagka-bise-gobernador si Magbanua kun pasulabihon man lang sini ang GRECON kag talikdan ang iya katungdanan bilang bise-gobernador.
